മരങ്ങൾ പച്ചയാകുന്നത്...(നമ്മളും)

എന്താണ് നമ്മുടെ പ്രണയം

ഇങ്ങനെ മരങ്ങളായ്‌ പോകുന്നത് ?

കാറ്റത്തെ ഇലയനക്കങ്ങൾ പോലെ 

എല്ലാം തലയാട്ടി സമ്മതിക്കുന്നുണ്ടെങ്കിലും

ഒന്നും മിണ്ടാറില്ലല്ലോ;

പരസ്പരം കാണുന്നുണ്ടെങ്കിലും

എത്ര കാലമായിങ്ങനെ 

അടുത്തിരിക്കാതെ, ഒന്ന് തൊടാതെ, 

ചലിയ്ക്കാതെ നിൽക്കുന്നു;

എങ്കിലും നമ്മളറിയാതെ വേരുകൾ 

പരസ്പരം പുണരുന്നുണ്ടാവും, 

അതുകൊണ്ട് മാത്രമാകും 

നമ്മുടെ മരങ്ങളിപ്പോഴും 

ഇങ്ങനെ പച്ചയായ് നില്‍ക്കുന്നത്