എടിയേ....

എടിയേ,

വന്നിട്ട് നീയെന്താണെന്നെയൊന്ന് വിളിക്കാഞ്ഞത്?

പരസ്പരം പറയാത്ത പ്രണയം

പൂഴ്ത്തിവച്ച വീഞ്ഞുപോലെ 

വീര്യം കൂടുമെന്ന് നിനക്കറിയില്ലേ?

മണമടിച്ചുതന്നെ ഞാനുന്മത്തനായിരിക്കുന്നു

പക്ഷെ, നീയറിയാതെ ഞാനിടയ്ക്കൊക്കെ

നിന്നെ വന്ന് കാണാറുണ്ട്..

നീയാവട്ടെ പല ഭാവത്തിൽ

ഞാനറിയാതെ നിൽക്കാറുമുണ്ട്

ഇങ്ങനൊക്കെയാണെങ്കിലും 

പലപ്പോഴും ഉപരിതലമുറഞ്ഞു പോയ

തടാകമാകുന്നു ഞാൻ

മുകളിലെ ഐസ് പാളിയിലൂടെ നോക്കൂ

കാണാം ഉള്ളിലെ തിരയിളക്കങ്ങൾ

ഇടയ്ക്കെങ്കിലും നീയൊരു വെയിലായ് പെയ്യൂ

നമ്മുക്കിടയിലെ ഐസ് പാളികളുരുക്കി

എന്റെ തിരകളെ സ്വതന്ത്രരാക്കൂ..

നീ എന്നെയോ, ഞാൻ നിന്നെയോ

വിളിക്കാത്തതിന്റെ കണക്കെടുപ്പല്ലിത്

പ്രണയത്തിനായ്

ഉടലുകൊണ്ട് പടവെട്ടാനാകാത്തതിനാൽ

വാക്കുകൾ കൊണ്ട് യുദ്ധം ചെയ്യുകയാണ്

ങാ പിന്നെ,

ഇത് നീയെഴുതിയാൽ

യുദ്ധമിതിലും ഗംഭീരമാകും

ഹാർട്ട് അറ്റാക്ക്

ഇയ്യിടെയായ് 

ഒരു മുറിവ് ഹൃദയത്തിൽ

വടുവായ് കൂട് കൂട്ടിയിരിക്കുന്നു

ഒരു ജീവനെ ആ കൂട്ടിൽ

പുറം ലോകം കാട്ടാതെ പൂട്ടിയിട്ടുണ്ട്

ഒരു വേദന ഇടയ്ക്കൊക്കെ വന്ന്

വാതിൽക്കൽ മുട്ടുന്നു

എന്റെ ജീവനേ, 

എന്റെ ജീവനേയെന്ന് വിളിച്ച് 

ഒളിച്ചോടാമെന്ന് പറയുന്നു..

പനി

കാടൻ സ്വപ്നങ്ങളുടെ കിടക്കയിൽ

പനി പുതച്ചു കിടക്കുമ്പോൾ

ഉറങ്ങുന്നില്ല

ഉണരുന്നില്ല

ഓർമ്മകൾ,

വെടിയൊച്ച കേട്ട കാക്കക്കൂട്ടമായ്

സ്വസ്ഥതയില്ലാതെ 

ബോധം കറുപ്പിക്കുന്നു

നാട്ടുനടപ്പനുസരിച്ചുള്ള ജീവിതം

നാട്ടുനടപ്പനുസരിച്ചാണ് 

ജീവിതം ഇപ്പോഴും പോകുന്നത് 

ഓട്ടോറിക്ഷയിൽ, ലൈൻ ബസ്സിൽ, 

ട്രാൻസ്പോർട്ട് ബസ്സിൽ, 

തീവണ്ടിയിലെ തിരക്കുള്ള 

ജനറൽ കമ്പാർട്ട്മെന്റിൽ 

ഞാൻ തന്നെ രാവിലെയെണീക്കുന്നതും 

പ്രഭാതകൃത്യങ്ങൾ ചെയ്യുന്നതും, കഴിക്കുന്നതും 

തീവണ്ടിയിൽ കയറാൻ ഓടുന്നതും 

എല്ലാം പതിവു പോലെ തന്നെ 

ഇരിക്കാൻ തരപ്പെട്ടാൽ 

ചുറ്റും വേറൊന്നുമില്ലയെന്ന പോൽ 

ചുമ്മാതെയുറങ്ങും 

തരപ്പെട്ടില്ലെങ്കിൽ 

തൂങ്ങി നിന്നുകൊണ്ട് 

അപരിചിതരുടെ ഒഴുക്കു നോക്കും 

അവരിൽ പരിചയക്കാരുടെ 

മുഖം കണ്ടെത്താൻ ശ്രമിക്കും 

ജൂബയിട്ടൊരാൾ 

വി.എസ്സിനെ പോലെ 

മുഖം കനപ്പിച്ചിരിക്കും 

എതിരെയൊരാൾ 

ഈ മരത്തൂണൊന്ന് ദ്രവിച്ചിരുന്നുവെങ്കിൽ 

നല്ല കോൺക്രീറ്റ് തൂണിൽത്തന്നെ 

പാർട്ടിയെ താങ്ങി നിർത്തിയേനെയെന്ന് 

ഉറക്കെ ചിന്തിക്കുന്നത് കേൾക്കാം 

ഇടയിലെ സ്റ്റേഷനിൽ 

പ്‍ളാറ്റ്ഫോം വൃത്തിയാക്കുന്നൊരുവൻ 

ആം ആദ്മിക്കാരനെന്ന് കരുതും 

അവനിലൂടെ ഒരു കെജ്‍രിവാൾ 

തൂത്തുതൂത്ത് പോകുന്നത് നോക്കി നിൽക്കും 

എങ്കിലും ഖദറിട്ടവരൊരിക്കലും 

അവളോട് ഇത്ര ക്രൂരത ചെയ്യ-

രുതായിരുന്നു എന്നൊരു ഖദർധാരി 

എന്നാലും എന്തെല്ലാം ചെയ്തുകാണുമെന്ന് 

അവന്റെയുള്ളിലൊരു ഗോവിന്ദച്ചാമി 

ഒറ്റക്കൈ പൊക്കിനിൽക്കുന്നു 

ഇതിന്നിടയിൽ 

ട്രെയിനിൽ നിന്നാരെങ്കിലും വീഴും 

അര ട്രൌസറിൽ പൊതിഞ്ഞ 

വെളുത്തകാല് കാണാൻ ആളുകൾ കൂടും 

മദാമ്മയെന്ന് വിളിച്ചവളെ 

ഏഷ്യൻ ഭൂഖണ്ഡം കടത്തിവിടും 

എല്ലായിടത്തും 

ചോരയ്ക്ക് ഒരേനിറമെന്ന് ചിന്തിച്ച് നിൽക്കുമ്പോൾ 

മൊബൈലെടുത്ത് ആരെങ്കിലും പടം പിടിക്കും 

നാട്ടുനടപ്പനുസരിച്ച് ഞാനുമെടുക്കുമൊന്ന് 

ട്രൌസറിനിടയിലൂടെ എന്തെങ്കിലും 

കാണാം പറ്റുമോയെന്നും നോക്കും 

ഇറങ്ങാനുള്ള സ്റ്റേഷനിൽ 

മറ്റാരും കയറും മുന്നേ തിരക്ക് പിടിച്ചിറങ്ങും 

പതിവ് പോലെ അല്പം താമസിച്ച് ഓഫീസിലെത്തും 

പണിചെയ്യുമ്പോലെ പണിചെയ്യും 

ഉണ്ണും ഉറങ്ങും 

അല്പം നേരത്തെയിറങ്ങും 

ട്രെയിൽ ലെയ്റ്റല്ലെങ്കിൽ 

സമയത്തിന് വീട്ടിലെത്തും 

പവർക്കട്ടിന്റെ സമയമെങ്കിൽ 

എമർജൻസി വെളിച്ചത്തിൽ 

മീൻകറി കൂട്ടി ചോറുണ്ണൂം 

ഏമ്പക്കം വിടും 

ഉറങ്ങും മുൻപേ 

മൊബൈലെടുത്ത് ആ പെണ്ണിന്റെ 

പടം ഒന്നുകൂടെ കാണും 

ശ്ശേ! കാര്യമായ് ഒന്നും 

കാണാനില്ലെന്ന് ദേഷ്യപ്പെട്ട് 

അടുത്ത തവണ എല്ലാം കാണുന്ന 

ആംഗിളിൽ തന്നെ പടം എടുക്കണമെന്നുറപ്പിച്ച് 

അലാറം വെച്ച് കിടന്നുറങ്ങും

സൌഹൃദം

സൌഹൃദങ്ങൾ,

ചെടികളെ പോലെയാണ്

അവ നടുന്നത് മണ്ണിലല്ല 

ഹൃദയങ്ങളിലാണെന്ന് മാത്രം

അവിടെനിന്നും ദേഹം മുഴുവൻ

പടരുന്ന ഞരമ്പുകളാണ് 

അവയുടെ വേരുകൾ

അതുകൊണ്ടാണ് വേരുറച്ചുപോയ

ചിലത് പിഴുതു മാറ്റുമ്പോൾ

കഠിനമായ് വേദനയെടുക്കുന്നതും

ചോര പൊടിഞ്ഞു നീറുന്നതും

വിത്ത്

കല്ലറകളുടെ കാവലില്ലാതെ 

എന്നെയും നിന്നെയും 

വിത്തുകളെ പോലെ 

വെറും മണ്ണിൽ 

കുഴിച്ചിടാൻ പറയണം 

മഴ പെയ്യുമ്പോൾ നമ്മുടെ

വിരലുകൾ വേരുകളാകും, 

കൈകൾ ശിഖരങ്ങളാകും 

നമ്മൾ മരങ്ങളായ് വളരും

കാതലുള്ളൊരു തലമുറ 

വളരുമെന്ന് ഇനിയെങ്കിലും 

നമുക്ക് സ്വപ്നം കാണാം