ഓർമ്മകൾ

ഓർമ്മകളെ അടക്കുന്ന കല്ലറയുടെ മുകളിൽ

നീ എന്റെ പേരെഴുതരുത്..

നമ്മുടെ സംസാരം തുടരുന്നതുവരേയെ

അതവിടെ കാണുകയുള്ളൂ

ഒരുകാലത്ത് പരസ്പരം മിണ്ടാതായാൽ

വിഘടിച്ച് വിഘടിച്ച് അവ പലവഴിക്ക് പിരിയും

ചിലത് നിന്റെ മുറ്റത്തെ ഞാവൽമരത്തിൽ

കാക്കകളും മറ്റും കൊത്തി വേദനിപ്പിക്കുന്ന

കറുത്തമുത്തുകളായ് താഴോട്ട് നോക്കിക്കിടക്കും

ചിലത് നിന്റെ തൊടിയിലെ

പാവൽ വള്ളികളിൽ കയ്ച്ച് കയ്ച്ച് പടരും

ചിലത് കല്ലെടുത്ത തുമ്പികളായ്

നിന്റെ മുന്നിൽ തലയടിച്ച് മരിച്ചേക്കാം

അവയെല്ലാം നിന്നെക്കുറിച്ചുള്ള എന്റെ 

ഓർമ്മകളായിരുന്നുവെന്ന് നീ ഒരിക്കലുമറിയരുത്

അതിനാലാണ്,

ഓർമ്മകളെ അടക്കുന്ന കല്ലറയുടെ മുകളിൽ

എന്റെ പേരെഴുതരുതെന്ന് പറഞ്ഞത്