സമയം കൊല്ലൽ !

ഇപ്പോൾ കൂട്ടൊരു 
ഡിജിറ്റൽ ക്ളോക്കാണ്

അക്കങ്ങളെല്ലാം ചുവന്ന് , ചുവന്ന്... 

പഴയ ടൈംപീസിന്റെ 

വാള്‍ കൈകളോ, കുളമ്പടി ശബ്ദമോ 

ഇല്ലാത്തത് കൊണ്ട് 

ധൈര്യമായ് നോക്കി കിടക്കാം,

ഇരുട്ടിനെ മായ്ച്ചെടുക്കാം,

സമയം കൊല്ലാം. 

ഹീമോഫിലിക്ക് രക്തം പോലെ

കട്ട പിടിക്കാതെ ഒഴുകുന്ന

ചുവന്ന ഡിജിറ്റൽ സമയം..

പൂജ്യം, ഒന്ന്, രണ്ട് എന്ന് 

അന്‍പത്തിയൊൻപതു വരെ എണ്ണിയെണ്ണി

ഓരോ മണിക്കൂറിനേയും ഇഞ്ചിഞ്ചായ് കൊല്ലും 

വന്നു വന്നു ഒന്നും ചെയ്യാനില്ലാത്ത 

പകലിനോടത്ര ഇഷ്ടം പോരാ..

ജനാലക്കർട്ടൻ വലിച്ചിട്ടു

കതകു ചേർത്തടച്ച്

ഇരുട്ടിനോട്‌ ചേർന്ന് കിടന്നു 

പിന്നെയും സമയം കൊല്ലും 

തലയ്ക്കടിയിൽ നിന്നും

മരവിച്ച കൈയ്യെടുത്ത്

കാലു ചൊറിഞ്ഞു, തുടയ്ക്കിടയിൽ വച്ച്

തിരിഞ്ഞു കിടക്കുമ്പോൾ

നേർത്തുനേർത്ത്  കേൾക്കുന്നുണ്ട് 

അന്‍പത്തിയൊന്പതു, അന്‍പത്തിയെട്ടു

എന്നൊരു തിരിച്ചെണ്ണൽ ;

ഒന്നു മയങ്ങിയ സമയത്ത്

എന്നെ കൊല്ലുകയാണ്..

ചാവ് കടൽ പോലൊരു

ചുവന്ന ഡിജിറ്റൽ സമയം

അവന്റെ സമയം കൊല്ലൽ !