മഞ്ഞുകാലം

ചതുര ജനാലയിൽക്കൂടി

നോക്കിനോക്കിയിരിക്കെ

മഞ്ഞുകാലം കടന്നുവരുന്നു

മരങ്ങൾ തണുത്തുവിറയ്ക്കുന്നു,

അവയെയാരും പുതപ്പിക്കുന്നില്ല;

കുതിരകളും, കഴുതകളും, പശുക്കളും

പുതപ്പിനടിയിലും തണുത്തുതണുത്ത്

മഞ്ഞുമേഞ്ഞു നടക്കുന്നു

രൂപമില്ലാത്ത മനസ്സിൽക്കൂടി നോക്കുമ്പോൾ

ദൂരെദൂരെ കണ്ണെത്താത്തിടത്ത്

നീ കരയുകയാണ്,

ഞാനെങ്ങനെയറിഞ്ഞെന്നാവും?

ആ കണ്ണുനീരൊഴുകുന്നത്

എന്റെ കണ്ണുകളിലൂടെയാണ്

ഉപ്പുചുവയുള്ളതുകൊണ്ടാണ്

കട്ടിയാകാൻ താമസിക്കുന്നത്

അല്പം വൈകിയാലും

അതും തണുത്തുറയുകയും

നീ മറക്കുകയും ചെയ്യും

ഇത് മഞ്ഞുകാലമാണ്...മഞ്ഞുകാലമാണ്...