അദൃശ്യപ്രണയം

നമ്മൾതമ്മിൽ ഒരിക്കലും 

കാണാതിരിക്കട്ടെ 

കാണാൻ അല്പമെങ്കിലും 

സാധ്യതയുള്ളയിടത്ത് 

നമ്മുക്ക് പോകാതിരിക്കാം 

അല്ലെങ്കിൽ 

ഞാൻ പോയിവന്നിട്ട് നീയോ 

നീ വന്നുപോയിട്ട് മാത്രം ഞാനോ

അവിടെയെത്തുക

നീ അവിടെയുണ്ടായിരുന്നു-

വെന്നോർത്ത് ഞാനും, 

ഞാനവിടെ ഉണ്ടായിരുന്നു-

വെന്നോർത്ത് നീയും 

അതുവഴി ഒറ്റയ്ക്ക് നടക്കുക 

അതൊരു കടൽത്തീരമെങ്കിൽ 

കടലിനെ കാണുന്ന 

ചാരുബഞ്ചിലിരുന്നു 

ഞാനെന്നോ നീയെന്നോ 

കരുതി കടലിനോട് 

വർത്തമാനം പറയുക 

നമ്മൾ തമ്മിൽ ഒരിക്കലും 

കാണാതിരിക്കട്ടെ 

നമ്മുടെ പ്രണയം അത്രയും 

അദൃശ്യമായിത്തന്നെയിരിക്കട്ടെ